2
tres ng umaga ng November 8, nagising ako sa iyak ng mga magulang
ko at ang iba pa naming kasama sa evacuation center. Mga alas tres o
alas-kwatro noon, hindi ko maintindihan ang tunog ng hangin.
Kakaiba at napakalakas.
Pinsan ko sumisigaw noon at lahat
nagkakagulo kasi mag-e-evacuate kami dahil baka mag-tsunami na.
Iyong tatay ko at mga kalalakihan sa amin ang nagbabantay sa paglaki
ng alon sa dagat.
Q5: Saan kayo nag-evacuate?
A5: Sa may lumang day-care center na mga sampung metro lang ang layo
sa bahay namin, pero nakataas o elevated siya ng kaunti kaya
pakiramdam namin ay ligtas kami roon.
Q6: Sino kasama mong nag-evacuate?
A6: Buong pamilya ko nag-evacuate. Pati mga tita at tito ko kasama ang
mga pamilya nila.
Q7: Anong nangyari noong nag-evacuate kayo?
A7: Noong araw na iyon, ang dala ko lang ay isang shoulder bag at
encyclopedia na hiniram ko sa library namin. Gusto ko lang mag-basa
sa evacuation center habang pinapalipas iyong bagyo. Ang laman
naman ng shoulder bag ko ay charger, ballpen, notebook, at cellphone
ko. Hindi ako nagdala ng damit kasi akala ko panandalian lang kami
roon at hindi masisira iyong bahay namin. Maraming bagyo na ang
dumaan at kapag nag-e-evacuate kami kaunti lang talaga dala namin.
May kahon lang kaming dadalhin at iyon na. Iyong storm surge, akala
namin ay lalaki lang ang tubig. Hindi namin alam dati ang ibig
sabihin noon e.
Noong kasagsagan ng bagyong Yolanda, may nakita ako na nanay na
malapit na mapugutan ng ulo dahil sa mga nagliparang G.I. sheets.
Ang mga G.I. sheets parang papel lang na nagliliparan. Tapos nakita
ko pa na ang nanay na iyon na bitbit niya ang anak niya na
nagkukumbulsyon pa.
Q8: Sa panahong iyon, ano ang sumagi sa isip mo?
A8: Naisip ko nga, na-corrupt ba ang pondo ng gymnasium namin at bakit
ang daling mabaklas? Marami akong nakitang mga bahay sa harap ng
day-care center na pinag-evacuate-an namin na nasira at
nagtumbahan.
Q9: Bukod dito, ano pa ang mga nakita at naranasan mo noong araw
na humagupit ang bagyong Yolanda?
A9: Noong Yolanda, hindi ko maipaliwanag iyong mga nakita at narinig
ko. Ang daming taong nagdagsaan sa evacuation center namin, mga
batang nag-e-evacuate kasi nasira iyong tinuluyan nilang evacuation
center. Makikita mo mga nanay natutumba sa harapan mo, mga G.I
sheets na lumilipad kung saan-saan.