Salaysay ni Bb. Marinel S. Ubaldo
Marinel S. Ubaldo, 21 taong gulang, taga-Matarinao Salcedo, Eastern
Samar.
(Ang Salaysay ni Marinel S. Ubaldo ay kinuha noong ika-5 ng Hulyo 2018
sa Canto Fresco, 279 Burgos Street, Downtown, Tacloban City, Leyte. Ang
Salaysay ay kinuha ni Atty. Hasminah D. Paudac, kasama si Bb. Desiree Llanos
Dee.)
Q1: Maaari mo ba kaming bigyan ng kaunting personal na
impormasyon o background tungkol sa iyo?
A1: Ako po ay isang 4th year college student na kasalukuyang nag-i-intern
sa isang komunidad sa Basey, Samar. Lumaki po ako sa Matarinao
Salcedo, Samar. Kami po ay naninirahan sa pinakadulo ng isang coast
o baybayin na nakaharap sa Pacific Ocean. Ang tatay ko ay isang
mangingisda at ang nanay ko ay housewife na tumutulong sa tatay ko
sa pagdadanggit at pagbebenta nito. Ako ang bunso sa tatlong
magkakapatid na babae.
Q2: Kumusta naman ang iyong kabataan sa Matarinao?
A2: Sa lugar namin noon wala masyadong sasakyan. Naglalaro lang kami
sa puting buhangin sa may gilid ng dagat. Iyon na ang kinalakihan
namin na kapaligiran. Pumupunta kami sa dagat at kumukuha ng
shells. Noong bata ako, hindi problema kung ano ang mauulam namin
kasi pwede kaming kumuha ng makakain sa dagat. Diyan lang sa tabi,
kahit hindi na pumalaot ng malayo, marami na kaming makukuhang
isda. Ang tatay ko, pupunta lang sa tabing-dagat, makakakuha na siya
agad ng isda. Iyan ang naging kabuhayan namin, kaya hindi na kami
kailangan bumili. Aakyat lang ako sa tuktok doon sa may lugar
namin, makikita ko na ang napakaraming puno ng niyog. Ang lolo ko
po ay mayroon tanim na mga niyog.
Q3: Malapit kayo sa Pacific Ocean, kumusta naman ang bagyo sa
lugar niyo?
A3: Naging parte ng aking kabataan ang mga bagyo kasi dinadaanan talaga
ang lugar namin. Kalimitan signal number 2 at hanggang 3 lang.
Iyong pinakamalakas na signal number 3 ay kaya pa rin naman.
Bearable pa at hindi nasisira ang bahay namin. Hindi rin namin
kailangan mag-evacuate. Ngayon, hindi na kaya kasi super typhoon
na talaga. Pag dumarating na ang bagyo, natatakot na kami at nag-eevacuate. Nasisira rin ang bahay namin tulad noong nangyari sa
Yolanda.
Q4: Maaari mo bang isalaysay kung ano ang nangyari noong
Yolanda?
A4: November 7 ng gabi wala ng kuryente sa amin. Okay pa naman ang
hangin at temperatura. Parang normal lang at matiwasay. Mga alas-