VI. Ryan Miguel D. Rivera The Initiative PH - Department of SOGIE Rights Ngayong naging patok ang pagdiriwang ng Pride kumpara noong nakaraan, umuusbong ang iba’t ibang inisyatibo para sa pagpapatatag ng puwesto ng LGBTQIA+ community tungo sa pangkalahatang pagkatanggap nito at sa pagkamit nito ng pantay na karapatan sa ating lipunan. Marami sa mga inisyatibong ito ay inilulunsad ng sektor ng kabataan, tulad ng mga samahang pang-adbokasiya. Ika nga nila, “Pride is a protest.” Tahasang nilalabanan ng makabagong henerasyon ang kulturang kontra-babae at kontra-LGBTQIA+ na naging laganap sa ating konserbatibong lipunan nang napakaraming dekada. Bagama’t marami pa ring tao ang gumagamit ng relihiyon bilang sandata para tutulan ang pagkakaroon ng iba pang seksuwalidad bukod sa pagiging straight, hindi na ito hinahayaan ng mga miyembro ng LGBTQIA+ na maging dahilan para ipagkait sa kanila ang nararapat nilang makuhang respeto bilang mga miyembro rin ng lipunan. At sa konteksto ng isang pandemya, iisa lamang ang naging kalabasan ng ganitong determinasyon: ang pagkakaisa. Noong buwan ng Hunyo, kasabay ng buong mundo, tumungo sa mga platapormang online ang kilusang Pride para magpatuloy ito nang makaiwas sahawaan. Hindi man natuloy ang malawakang selebrasyon ng Pride Parade tulad noong mga nakaraang taon, umusbong naman ang iba’t ibang organisasyon na naglunsad ng mga gawaing nagpakilala sa LGBTQIA+ community sa mas malawakna lipunan sa pamamagitan ng mga webinar, educational discussion, infographic, art showcase, at marami pang iba. Gayundin, nagpatuloy naman ang mga kilos-protesta ng sektor ng LGBTQIA+ laban sa patuloy na paglapit sa pasismo at paglabag ng mga karapatang pantao. Naging bokal ang komunidad matapos makulong ang 20 miyembro ng Bahaghari noong Pride March nang walang maibigay na dahilan, hanggang sa sila ay mapalaya muli. Sumatutal, limitado mang paggalaw ang naging bunsod ng COVID-19, ipinakita ng LGBTQIA+ ang pagkamaparaan nito para malampasan ang lahat ng mga limitasyong ito sa pagpapahayag ng adbokasiya.