1
Salaysay ni Gg. Jonathan B. delos Reyes
Jonathan B. delos Reyes, 40 taong gulang, may asawa, apat na anak,
naninirahan sa Mariveles, Bataan, dating guro, at sa kasalukuyan ay nangangasiwa
ng bagsakan at trading ng isda na tinatawag na consignasyon.
(Ang Salaysay ni Gg. Jonathan B. delos Reyes ay kinuha noong ika-4 ng Mayo
2018 sa opisina ng Greenpeace Southeast Asia-Philippines na matatagpuan sa
Room 201 JGS Building, 30 Scout Tuazon Street, Barangay Laging Handa, Quezon
City. Ang Salaysay ay kinuha nila Attys. Zelda DT. Soriano at Hasminah D. Paudac,
kasama si Bb. Veronica Cabe, isa sa mga naghain ng Petisyon.)
Q1: Alam po ba ninyo kung bakit kayo naririto?
A1: Nasabi po sa akin ni Derek (buong pangalan ay Bb. Veronica Cabe) ang
tungkol sa kanilang human rights at climate change petition.
Inimbitahan po niya ako at ako ay pumayag na ibahagi ang aking
karanasan bilang maliit na negosyante at kung paano posibleng
naaapektuhan ng climate change ang aming maliit na consignasyon.
Q2: Pakipaliwanag n’yo nga po muna kung ano ang consignasyon…
A2: Iyan po ang karaniwang sistema ng trading ng isda. Ang negosyante
(broker) na nangangasiwa ng bagsakan ng isda (trading post) ay
nagpapautang sa mangingisda at ang mga nagkakautang na
mangingisda ay may obligasyong magbagsak ng kanilang huling isda
sa pinagkakautangan negosyante. Sa negosyante bumubulong ng bid
ang mga nais pumakyaw o mamili ng isda. Sekretong bidding ito para
makuha ang best prices para sa isda. Kumikita ang katulad ko pong
nangangasiwa ng bagsakan sa pamamagitan ng pagkuha ng komisyon
mula sa mga bentahang nagaganap sa bagsakan.
Q3: Gaano katagal na po kayong nangangasiwa ng consignasyon?
A3: Mula pa po noong bandang 2003. Ang tatay ko po ang dating
nagmamanage ng consignasyon. Ipinagpatuloy ko lamang po ang
kanyang negosyo.
Q4: Balik po tayo sa kung bakit kayo narito . . . pamilyar po kayo sa
nasabi ninyong climate change?
A4: Ayon lamang po sa nasusubaybayan ko sa mga balita at talakayan sa
mga programa sa telebisyon at radyo, at sa sariling karanasan na rin
po... malaki na po ang ipinagbago ng klima...
Q5: Bakit n’yo po nasabing malaki na ang ipinagbago ng klima?
A5: Napakatindi na po ng init. Noon, tinatalon at nilalangoy naming mga
bata ang Santol River. Ngayon, ang Santol River ay putik at burak na
lang. Noon, natutulog kami sa tanghali kasi presko naman. Ngayon,
hindi kami makatulog sa sobrang init. Noon din, naliligo kami sa Mattel
Beach at walang problema. Sa ngayon, kapag naligo sa Mattel Beach,
nangangati ang balat namin.